有些家長非常有福爾摩斯精神，他們對於某些問題，窮追猛打，彷彿找不到「真凶」（答案）誓不休，以下為令人百思不解的問題，在家長「連珠發炮」追問之中，似乎找到了答案，為保留其真，我將口語保留。
「點解官立、津貼及直資的名小學，咁鍾意收果幾間幼稚園嘅學生？」家長問。
「收果幾間有乜奇怪呢？」我答。
「仲話唔奇，香港小學派位，話到明係用計分制，即係有分先有得入，無分便無得入，完全無話讀邊間幼稚園有分，點解咁多名小學會收到果幾間幼稚園嘅畢業生呢？」
「你講得好啱！不過香港嘅官立、津貼小學計分，但直資、私校唔計分，只要那些幼稚園課程銜接果啲直資、私校，便容易入到名私立、名直資了！此其一！」
「你即係話佢地嘅課程不錯？」
「啱，除了課程，英文亦教得幾好，不過，還有兩點是重要的。」
「邊兩點？」家長問。
「第一點係呢幾間幼稚園學生非常多，普通幼稚園有一、二百人，這幾間幼稚園，一間有千幾二千人，一間八、九百人，足足多人四、五倍，即是說普通幼稚園入一個，佢地便可以入四至五個。望落去，便好似佢地嘅畢業生入曬名小學了！」
「明白，人多勢眾，眾志成城也！」家長突然文雅起來，又問：「還有最後一點呢？」
「最後一點，也是最重要一點，這一點與計分有關，所以除了官立、津貼，也與重視關係的直資小學有關，我發覺果幾間幼稚園要求家長將自己讀邊間小學，填上入學申請表，又要求將孩子兄弟姊妹的年齡、學校、班別一併填上，這兩項資料與將來孩子報讀官、津小學有關，因為只要父母讀過名小學，便有10分，孩子之兄姊正在該校讀小學，便必被取錄，即是說，只要幼稚園收咗這批父母讀過名小學，兄姊在讀名小學的孩子，再加上孩子符合入學條件，及適齡，便差不多有八、九成機會，可以入名小學了！」
「以上三點，可以解釋官、津以至直資名校，鍾意收果幾間幼稚園的原因了。」
「多謝！」家長滿意而去。
